హరివరాసనం విశ్వమోహనం. శబరిమల అయ్యప్ప స్వామి పవళింపు సందర్భంగా పాడే ఈ మధురమైన  పాట వింటే భక్తుల మనసులో ఆనందం తాండవిస్తుంది. ఈ అయ్యప్ప స్వామి పవళింపు స్తోత్రాన్ని కుంభకుడి కులత్తూర్ అయ్యర్ రచించారు. 1955లో స్వామి విమోచనానంద అయ్యర్ ఈ స్తోత్రాన్ని శబరిమలలో ఆలపించారట. శబరిమలలో ప్రతిరోజూ స్వామిని నిద్రపుచ్చడానికి, ఆలయాన్ని మూసేసే ముందు ఈ కీర్తనను ఆలపిస్తారు. హరివరాసనం చదువుతున్నపుడు గర్భగుడిలో ఒక్కొక్క దీపం కొండెక్కిస్తూ, చివరికి ఒక్క దీపం మాత్రమే ఉంచుతారు. ఇది స్వామివారికి నిద్రపోయేముందు పాడే జోల పాట లాంటిది. హరివరాసనం పూర్తయిన తరువాత నమస్కారం చేయవద్దని, స్వామి శరణు అని చెప్పుకోవద్దని అంటారు. ఈ హరివరాసనం స్తోత్రానికి ఇప్పుడు తెలుగులో అర్థం తెలుసుకునే ప్రయత్నం చేద్దాం.

హరివరాసనం విశ్వమోహనం
హరిదధీశ్వరం ఆరాధ్యపాదుకమ్ ।
అరివిమర్దనం నిత్యనర్తనం
హరిహరాత్మజం దేవమాశ్రయే ॥ 1 ॥

హరివరాసనం– శ్రేష్టమైన పులిని ఆసనంగా కలిగినవాడు
విశ్వమోహనం – విశ్వాన్నే మోహింపచేసేవాడు
హరిదధీశ్వరం – అన్నిదిక్కులకు అధిపతి అయినవాడు
ఆరాధ్యపాదుకమ్ – పూజనీయమైన పాదాలు కలవాడు
అరివిమర్దనం – కామ క్రోధాది శత్రువులను నాశనం చేసేవాడు
నిత్యనర్తనం – ఆత్మ స్వరూపంగా నిత్యం మనలో నర్తించేవాడు
హరిహరాత్మజం దేవమాశ్రయే – అటువంటి- హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 1 ॥

శరణకీర్తనం భక్తమానసం
భరణలోలుపం నర్తనాలసమ్ ।
అరుణభాసురం భూతనాయకం
హరిహరాత్మజం దేవమాశ్రయే ॥ 2 ॥

శరణకీర్తనం- సక్తమానసం  – శరణుఘోషలపై ఆసక్తి ఉన్న మనసుకలవాడు
భరణలోలుపం     –          తన భక్తులను భరించడంలో/పోషించడంలో మిక్కిలి ఆసక్తి కలవాడు
నర్తనాలసమ్        –          నిత్యం నాట్యం చేస్తూ అలసినవాడు(జగత్తును నడిపే లీల చేసి అలసినవాడు)
అరుణభాసురం    –          అరుణ వర్ణంతో ప్రకాశించేవాడు
భూతనాయకం     –          సకలజీవులకు అధిపతి, భూతగణాలకు నాయకుడు
హరిహరాత్మజం దేవమాశ్రయే – హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 2 ॥

ప్రణయసత్యకం ప్రాణనాయకం
ప్రణతకల్పకం సుప్రభాంచితమ్ ।
ప్రణవమందిరం కీర్తనప్రియం
హరిహరాత్మజం దేవమాశ్రయే ॥ 3 ॥

ప్రణయసత్యకం    –          సత్యమైన ప్రేమకు నిలయమైనవాడు
ప్రాణనాయకం     –          ప్రాణాలకు అధిపతి
ప్రణతకల్పకం       –          శరణు కోరిన భక్తులకు కల్పవృక్షం వంటివాడు
సుప్రభాజితమ్      –          గొప్ప కాంతితో ప్రకాశించేవాడు
ప్రణవమందిరం    –          ఓంకారమనే మందిరంలో కొలువుండేవాడు
కీర్తనప్రియం         –          కీర్తనలను ఇష్టపడేవాడు
హరిహరాత్మజం దేవమాశ్రయే – హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 3 ॥

తురగవాహనం సుందరాననం
వరగదాయుధం వేదవర్ణితమ్ ।
గురుకృపాకరం కీర్తనప్రియం
హరిహరాత్మజం దేవమాశ్రయే ॥ 4 ॥

తురగవాహనం     –          గుర్రం వాహనంగా కలవాడు
సుందరాననం      –          అందమైన ముఖం కలవాడు
వరగదాయుధం    –          శ్రేష్టమైన వరప్రదమైన గద ఆయుధంగా కలవాడు
వేదవర్ణితమ్         –          వేదాలచే వర్ణించబడినవాడు
గురుకృపాకరం     –          గురురూపంగా కృపను ప్రసాదించేవాడు
కీర్తనప్రియం         –          కీర్తనలను ఇష్టపడేవాడు
హరిహరాత్మజం దేవమాశ్రయే – హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 4 ॥

త్రిభువనార్చితం దేవతాత్మకం
త్రినయనప్రభుం దివ్యదేశికమ్ ।
త్రిదశపూజితం చింతితప్రదం
హరిహరాత్మజం దేవమాశ్రయే ॥ 5 ॥

త్రిభువనార్చితం     –          మూడు లోకాలచే పూజింపబడేవాడు
దేవతాత్మకం        –          దేవతా స్వరూపుడు
త్రినయనం ప్రభుం             –          ముక్కంటి అయిన ఈశ్వరుని స్వరూపము
దివ్యదేశికమ్        –          దివ్యమైన ఉపదేశాలిచ్చే గురువు
త్రిదశపూజితం      –          సమస్త దేవతలచే పూజింపబడేవాడు
చింతితప్రదం       –          కోరిన కోరికలు తీర్చేవాడు
హరిహరాత్మజం దేవమాశ్రయే – హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 5 ॥

భవభయాపహం భావుకావకం
భువనమోహనం భూతిభూషణమ్ ।
ధవళవాహనం దివ్యవారణం
హరిహరాత్మజం దేవమాశ్రయే ॥ 6 ॥

భవభయాపహం   –          సంసార భయాన్ని పోగొట్టేవాడు
భావుకావహం      –          శుభాలను కలిగించేవాడు
భువనమోహనం   –          సమస్త లోకాలను మోహింపజేసేవాడు
భూతిభూషణమ్   –          విభూతిని అలంకారంగా ధరించినవాడు
ధవళవాహనం దివ్యవారణం – తెల్లని ఏనుగు వాహనంగా కలవాడు
హరిహరాత్మజం దేవమాశ్రయే – హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 6॥

కలమృదుస్మితం సుందరాననం
కళభకోమలం గాత్రమోహనమ్ ।
కళభకేసరీవాజివాహనం
హరిహరాత్మజం దేవమాశ్రయే ॥ 7 ॥

కలమృదుస్మితం    –          మృదువైన చిరునవ్వు కలవాడు
సుందరాననం      –          అందమైన ముఖం కలవాడు
కలభకోమలం      –          పసిపిల్లలవంటి కోమలమైన శరీరం కలవాడు
గాత్రమోహనమ్    –          అద్భుతమైన గాత్రసౌందర్యంతో అందరినీ మోహింపజేసేవాడు
కలభకేసరీవాజివాహనం      –          ఏనుగు, సింహం, గుర్రం వంటి వాహనాలను కలిగినవాడు
హరిహరాత్మజం దేవమాశ్రయే –        హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 7 ॥

శ్రితజనప్రియం చింతితప్రదం
శ్రుతివిభూషణం సాధుజీవనమ్ ।
శ్రుతిమనోహరం గీతలాలసం
హరిహరాత్మజం దేవమాశ్రయే ॥ 8 ॥

శ్రితజనప్రియం     –          ఆశ్రయించిన జనులకు ప్రియమైనవాడు
చింతితప్రదం       –          కోరిన కోరికలు తీర్చేవాడు
శృతివిభూషణం    –          వేదములలో స్తుతించబడినవాడు
సాధుజీవనమ్      –          సాధువుల జీవనానికి స్ఫూర్తి అయినవాడు
శృతిమనోహరం    –          వేదములలో స్తుతించబడిన మనోహరమైనవాడు
గీతలాలసం         –          కీర్తనలను వినడానికి మిక్కిలి ఇష్టపడేవాడు
హరిహరాత్మజం దేవమాశ్రయే –        హరిహరుల పుత్రుడైన అయ్యప్ప స్వామిని నేను ఆశ్రయిస్తున్నాను॥ 8 ॥

శరణం అయ్యప్పా స్వామి శరణం అయ్యప్పా ।
శరణం అయ్యప్పా స్వామి శరణం అయ్యప్పా ॥

ఈ స్తోత్రం,తెలుగులో అర్థం వీడియొ రూపంలో చూడాలనుకుంటే ఈ వీడియొ చూడండి