జయ విజయులు రాక్షసులుగా ఎందుకు మారారు?
వైకుంఠంలో సాక్షాత్తూ ఆ శ్రీమహావిష్ణువు ఉండే ప్రదేశానికి ఇరువైపులా కాపలాగా ఉండే సేవకులే జయ, విజయులు. వీరు స్వామివారికి పరమ భక్తులు. ఎప్పుడూ ఆయన ధ్యానంలోనే ఉంటూ సేవలు చేసేవాళ్లు. విష్ణుమూర్తిని చూడటానికి వచ్చే వాళ్లను గమనించి, లోపలికి పంపడమే వీరి పని.
మహర్షుల రాక: ఒకరోజు బ్రహ్మదేవుని కుమారులైన సనక, సనందన, సనాతన, సనత్కుమారులు అనే నలుగురు మహర్షులు వైకుంఠానికి వచ్చారు. వీరు ఎంతో గొప్ప తపస్సు చేసినవారు. వాళ్లకు వయసు చాలా ఎక్కువైనా, చూడటానికి మాత్రం ఎప్పుడూ ఐదేళ్ల చిన్న పిల్లల్లాగే కనిపిస్తుంటారు.
ఏడో గుమ్మం దగ్గర అడ్డగింపు – శాపం: ఆ నలుగురు మహర్షులు విష్ణుమూర్తిని చూడాలనే కోరికతో ఆరు గుమ్మాలు దాటుకుని ఏడో గుమ్మం దగ్గరకు వచ్చారు. కాపలా ఉన్న జయ-విజయులు ఆ మహర్షులను చూసి చిన్న పిల్లలు అనుకున్నారు. “స్వామివారు లోపల విశ్రాంతి తీసుకుంటున్నారు, ఇప్పుడు లోపలికి వెళ్లడానికి వీల్లేదు” అని వాళ్లను అడ్డుకున్నారు.
గొప్ప జ్ఞానులైన తమను, అజ్ఞానంతో అడ్డుకున్నారని మహర్షులకు చాలా కోపం వచ్చింది. “కోపం, అహంకారం ఏమాత్రం లేని ఈ పవిత్రమైన వైకుంఠంలో ఉండే అర్హత మీకు లేదు. మీరు భూలోకంలో క్రూరమైన రాక్షసులుగా పుట్టండి” అని శపించారు.
విష్ణుమూర్తి దయ – మూడు జన్మల రహస్యం: ఈ అలికిడి విని బయటకు వచ్చిన శ్రీమహావిష్ణువు, జరిగినది తెలుసుకున్నాడు. జయ-విజయులు స్వామివారి కాళ్ల మీద పడి వెక్కి వెక్కి ఏడ్చారు.
అప్పుడు విష్ణుమూర్తి “మహర్షుల శాపాన్ని నేను వెనక్కి తీసుకోలేను. కానీ మీకు రెండు దారులు ఇస్తున్నాను. భూలోకంలో నా భక్తులుగా ఏడు జన్మలు ఎత్తుతారా? లేదా నా శత్రువులుగా మూడు జన్మలు ఎత్తుతారా? మీరే కోరుకోండి” అని అడిగాడు.
స్వామికి ఏడు జన్మల పాటు దూరం కాలేమని, తొందరగా వైకుంఠానికి తిరిగి రావాలని “నీకు శత్రువులుగానే మూడు జన్మలు ఎత్తుతాము స్వామీ” అని జయ-విజయులు వేడుకున్నారు. అలా వాళ్లు మూడు యుగాలలో భయంకరమైన రాక్షసులుగా పుట్టారు.
- మొదటి జన్మ (కృతయుగం): హిరణ్యాక్షుడు, హిరణ్యకశిపుడుగా పుట్టారు. భూమిని పాతాళంలోకి దాచిన హిరణ్యాక్షుడిని విష్ణుమూర్తి ‘వరాహ అవతారం’ ఎత్తి సంహరించాడు. అలాగే తన భక్తుడైన ప్రహ్లాదుడిని రక్షించడానికి ‘నరసింహ అవతారం’లో వచ్చి హిరణ్యకశిపుడిని చంపాడు.
- రెండవ జన్మ (త్రేతాయుగం): రావణుడు, కుంభకర్ణుడుగా పుట్టారు. వీళ్లను చంపడానికి శ్రీమహావిష్ణువు ‘శ్రీరాముడిగా’ అవతరించాడు.
- మూడవ జన్మ (ద్వాపరయుగం): శిశుపాలుడు, దంతవక్రుడుగా పుట్టారు. ఈ జన్మలో స్వామి ‘శ్రీకృష్ణుడిగా’ పుట్టి, తన సుదర్శన చక్రంతో వాళ్లను చంపి శాపవిమోచనం కలిగించాడు.
ఇలా మూడు జన్మలపాటు శత్రువులుగా పుట్టినా, ఎప్పుడూ స్వామినే తలుచుకుంటూ చివరకు ఆ మహావిష్ణువు చేతిలోనే ముక్తిని పొందారు. మళ్లీ వైకుంఠం చేరుకుని తమ పాత స్థానంలో కాపలాదారులుగా మారిపోయారు.
అందుకే ఇప్పటికీ ప్రతి వైష్ణవ గుడిలో (తిరుమల, భద్రాచలం లాంటి గుళ్లలో) గర్భగుడికి ఇరువైపులా చేతిలో గద పట్టుకుని ఉండే విగ్రహాలు ఆ జయ-విజయులవే. ముందుగా వాళ్లని దర్శించుకున్న తర్వాతే మనకు స్వామివారి దర్శనం కలుగుతుంది.
ఈ సమాచారాన్ని వీడియొ రూపంలో చూడాలనుకుంటే ఈ లింక్ ఓపెన్ చేసి వీడియొ చూడండి 👇👇👇. మరెంతో ఆధ్యాత్మిక, ధార్మిక సమాచారం కోసం భారతీయ సంస్కృతి ఛానల్ ను subscribe చేసుకోండి.
