చిత్కళా,ఽనందకలికా, ప్రేమరూపా, ప్రియంకరీ ।

నామపారాయణ ప్రీతా, నందివిద్యా, నటేశ్వరీ ॥ 141 ॥

చిత్కళానందకలికా : ఙ్ఞానము, ఆనందము అను జ్యోతిస్వరూపిణి

ప్రేమరూపా : ప్రేమమూర్తి

ప్రియంకరీ : కోరికలు సిద్ధింపచేయునది

నామపారాయణ ప్రీతా : తన నామములను పారాయణచేయు వారియందు ప్రీతి కలిగినది

నందివిద్యా : అమ్మవారికి సంబంధించిన ఒక మంత్ర విశేషము

నటేశ్వరీ : నటరాజు యొక్క శక్తి

మిథ్యా జగదధిష్ఠానా ముక్తిదా, ముక్తిరూపిణీ ।

లాస్యప్రియా, లయకరీ, లజ్జా, రంభాది వందితా ॥ 142 ॥

మిథ్యాజగదధిష్ఠానా :మాయాజగత్తునందు చైతన్యరూపిణియై ఉండునది

ముక్తిదా : విముక్తినిచ్చునది

ముక్తిరూపిణీ : మోక్షరూపిణి

లాస్యప్రియా : లలితమైన నృత్యమునందు ప్రీతి కలిగినది

లయకరీ : జగత్తును లయము చేయునది

లజ్జా : లజ్జాస్వరూపిణి

రంభాది వందితా :రంభ మొదలైన అప్సరసలచే నమస్కారములు అందుకొనునది

భవదావ సుధావృష్టిః, పాపారణ్య దవానలా ।

దౌర్భాగ్యతూల వాతూలా, జరాధ్వాంత రవిప్రభా ॥ 143 ॥

భవదావ సుధావృష్టి: : జన్మపరంపరలు అను దావాగ్నిని చల్లార్చుటకు అమృతవర్షము వంటిది

పాపారణ్యదవానలా : పాపములు అనే అరణ్యమునకు కార్చిచ్చు వంటిది

దౌర్భాగ్యతూలవాతూలా : దారిద్ర్యము, దురదృష్టము అనే పక్షి ఈకలకు హోరుగాలి వంటిది

జరాధ్వాంతరవిప్రభా : ముసలితనమనే చీకటికి సూర్యకాంతి వంటిది

భాగ్యాబ్ధిచంద్రికా, భక్తచిత్తకేకి ఘనాఘనా ।

రోగపర్వత దంభోళి, ర్మృత్యుదారు కుఠారికా ॥ 144 ॥

భాగ్యాబ్ధి చంద్రికా : సంపద అనే సముద్రమునకు వెన్నెల వంటిది

భక్తచిత్త కేకిఘనాఘనా : భక్తుల మనస్సులు అనే నెమళ్ళకు వర్షాకాలపు మేఘము వంటిది

రోగపర్వతదంభోళిః : పర్వతములవంటి రోగములకు వజ్రాయుధము వంటిది

మృత్యుదారు కుఠారికా : మృత్యువనే వృక్షమునకు గొడ్డలి వంటిది

మహేశ్వరీ, మహాకాళీ, మహాగ్రాసా, మహాఽశనా ।

అపర్ణా, చండికా, చండముండాఽసుర నిషూదినీ ॥ 145 ॥

మహేశ్వరీ : మహేశ్వరుని ప్రియురాలు

మహాకాళీ : కాళికా దేవి రూపము దాల్చినది

మహాగ్రాసా : అధికమైన ఆహారమును కోరునది

మహాశనా : లయకారిణి

అపర్ణా : పార్వతీ దేవి

చండికా : అసురుడైన చండుడిని సంహరించిన చండీ దేవి స్వరూపిణి

చండముండాసుర నిషూదిని : చండుడు, ముండుడు అనే రాక్షసులను సంహరించినది

క్షరాక్షరాత్మికా, సర్వలోకేశీ, విశ్వధారిణీ ।

త్రివర్గదాత్రీ, సుభగా, త్ర్యంబకా, త్రిగుణాత్మికా ॥ 146 ॥

క్షరాక్షరాత్మికా : నశించునట్టి జగత్తు, శాశ్వతమైన చిన్మయ తత్వము రెండూ తానే రూపంగా ఐనది

సర్వలోకేశీ : అన్ని లోకములకు అధీశ్వరి

విశ్వధారిణీ : విశ్వమును ధరించినది

త్రివర్గదాత్రీ : ధర్మ, అర్ధ, కామములను ఇచ్చునది

సుభగా : సౌభాగ్యవతి

త్ర్యంబకా : మూడు కన్నులు కలది

త్రిగుణాత్మికా : సత్వ, రజో, తమో గుణములను ఇచ్చునది.

స్వర్గాపవర్గదా, శుద్ధా, జపాపుష్ప నిభాకృతిః ।

ఓజోవతీ, ద్యుతిధరా, యజ్ఞరూపా, ప్రియవ్రతా ॥ 147 ॥

స్వర్గాపవర్గదా : స్వర్గమును అపవర్గమును (అనగా మోక్షమును) ప్రసాదించునది.

శుద్ధా : మలినము లేనిది, పవిత్రమైనది.

జపాపుష్ప నిభాకృతిః : మందార పువ్వు వంటి ఛాయ కలిగినది.

ఓజోవతీ : ఓజస్సు కలిగినటువంటిది.

ద్యుతిధరా : శోభించునది.

యజ్ఞరూపా : యజ్ఞమును తన రూపముగా కలిగినది.

ప్రియవ్రతా : సంకల్ప నిష్ఠలతో కూడిన వ్రతముల యందు ప్రీతి కలిగినది.

దురారాధ్యా, దురాదర్షా, పాటలీ కుసుమప్రియా ।

మహతీ, మేరునిలయా, మందార కుసుమప్రియా ॥ 148 ॥

దురారాధ్యా : (ఇంద్రియ నిగ్రహం లేని యెడల) దుర్గమమైన ఆరాధన కలది.

దురాధర్షా : (శుద్ధమైన భక్తిచే తప్ప) నియంత్రించ లేనిది

పాటలీ కుసుమప్రియా : పాటలీ పుష్పం (పాదిరి పువ్వు) పట్ల ప్రీతి కలది.

మహతీ : అందరికన్నా, అన్నిటికన్నా గొప్పనైనది.

మేరునిలయా : మేరు పర్వత నివాసిని

మందార కుసుమప్రియా : మందార పుష్పముల యందు ప్రీతి కలిగినది.

వీరారాధ్యా, విరాడ్రూపా, విరజా, విశ్వతోముఖీ ।

ప్రత్యగ్రూపా, పరాకాశా, ప్రాణదా, ప్రాణరూపిణీ ॥ 149 ॥

వీరారాధ్యా : వీరులచే ఆరాధింపబడునది

విరాడ్రూపా : అన్నింటికీ మూలమైనది

విరజా : రజోగుణము లేనిది

విశ్వతోముఖీ : విశ్వం అంతటినీ ఒకేసారి చూడగల్గిన ముఖము కలిగినది

ప్రత్యగ్రూపా : నిరుపమానమైన రూపము కలిగినది

పరాకాశా : భావనామాత్రమైన ఆకాశ స్వరూపిణి

ప్రాణదా : సర్వజగత్తుకూ ప్రాణమును ఇచ్చునది

ప్రాణరూపిణీ : జీవులలో గల ప్రాణమే రూపముగా కలిగినది

మార్తాండ భైరవారాధ్యా, మంత్రిణీ న్యస్తరాజ్యధూః ।

త్రిపురేశీ, జయత్సేనా, నిస్త్రైగుణ్యా, పరాపరా ॥ 150 ॥

మార్తాండభైరవారాధ్యా :మార్తాండభైరవునిచే ఆరాధింపబడునది (శివుని యొక్క ఒకరూపం మార్తాండభైరవుడు)

మంత్రిణీ : శ్యామలాదేవి

న్యస్తరాజ్యధూ : రాజ్యాధికారము ఇచ్చునది

త్రిపురేశీ : త్రిపురములకు అధికారిణి

జయత్సేనా : అందరినీ జయించగల సైన్యము కలది

నిస్త్రైగుణ్యా :త్రిగుణాతీతురాలు

పరాపరా : ఇహము, పరము రెండునూ తానై యున్నది

సత్యజ్ఞానాఽనందరూపా, సామరస్య పరాయణా ।

కపర్దినీ, కలామాలా, కామధుక్,కామరూపిణీ ॥ 151 ॥

సత్య ఙ్ఞానానంద రూపా :సచ్చిదానందరూపిణీ

సామరస్య పరాయణా : జీవుల యెడల సమరస భావముతో ఉండునది

కపర్దినీ : జటాజూటము కలిగినది (జటాజూటధారి అయిన శివునకు కపర్ది అను పేరు కలదు)

కళామాలా : కళల యొక్క సమూహము

కామధుక్ : కోరికలను ఇచ్చు కామధేనువు వంటిది

కామరూపిణీ : కోరిన రూపము ధరించునది

కళానిధిః, కావ్యకళా, రసజ్ఞా, రసశేవధిః ।

పుష్టా, పురాతనా, పూజ్యా, పుష్కరా, పుష్కరేక్షణా ॥ 152 ॥

కళానిధి: కళలకు నిధి వంటిది

కావ్యకళా : కవితారూపిణి

రసఙ్ఞా : సృష్టి యందలి సారము తెలిసినది

రసశేవధి: రసమునకు పరాకాష్ట

పుష్టా : పుష్ఠి కలిగించునది

పురాతనా : అనాదిగా ఉన్నది

పూజ్యా : పూజింపదగినది

పుష్కరా : పుష్కర (కమల) రూపిణి

పుష్కరేక్షణా : కమలము వంటి (విశాలమైన) కన్నులు కలది.

పరంజ్యోతిః, పరంధామ, పరమాణుః, పరాత్పరా ।

పాశహస్తా, పాశహంత్రీ, పరమంత్ర విభేదినీ ॥ 153 ॥

పరంజ్యోతి: దివ్యమైన వెలుగు

పరంధామ :శాశ్వతమైన స్థానము కలిగినది

పరమాణు: :అత్యంత సూక్ష్మమైనది

పరాత్పరా :సమస్తలోకములకు పైన ఉండునది

పాశహస్తా :పాశమును హస్తమున ధరించినది

పాశహంత్రీ :జీవులను సంసార బంధము నుండి విడిపించునది

పరమంత్ర విభేదినీ :శత్రువుల మంత్ర ప్రయోగములను పటాపంచలు చేయునది.

మూర్తా,ఽమూర్తా,ఽనిత్యతృప్తా, ముని మానస హంసికా ।

సత్యవ్రతా, సత్యరూపా, సర్వాంతర్యామినీ, సతీ ॥ 154 ॥

మూర్తామూర్తా :రూపం కలది, రూపం లేనిది రెండూ తానే ఐనది

నిత్యతృప్తా :ఎల్లప్పుడూ తృప్తితో ఉండునది

మునిమానస హంసికా :మునుల మనస్సులనే సరస్సులందు విహరించే హంసరూపిణి

సత్యవ్రతా :సత్యమే వ్రతముగా కలిగినది

సత్యరూపా :సత్యమే రూపముగా కలిగినది

సర్వాంతర్యామినీ :సృష్టి అంతటా వ్యాపించినది

సతీ :దక్షప్రజాపతి కూతురు, శివుని అర్ధాంగి అయిన సతీదేవి.

బ్రహ్మాణీ, బ్రహ్మజననీ, బహురూపా, బుధార్చితా ।

ప్రసవిత్రీ, ప్రచండాఽజ్ఞా, ప్రతిష్ఠా, ప్రకటాకృతిః ॥ 155 ॥

బ్రహ్మాణీ :సరస్వతీ దేవి (బ్రహ్మదేవుని భార్య)

బ్రహ్మజననీ :బ్రహ్మదేవుడిని సృష్టించినది

బహురూపా :సమస్త రూపములు తానై ఉన్నది

బుధార్చితా :ఙ్ఞానులచే పూజింపబడునది

ప్రసవిత్రీ :జగజ్జనని

ప్రచండాఙ్ఞా :తీవ్రమైన ఆఙ్ఞ కలది

ప్రతిష్ఠా :కీర్తియే రూపముగా కలిగినది

ప్రకటాకృతి: :బహిరంగమైన ఆకారము కలిగినది

ప్రాణేశ్వరీ, ప్రాణదాత్రీ, పంచాశత్-పీఠరూపిణీ ।

విశృంఖలా, వివిక్తస్థా, వీరమాతా, వియత్ప్రసూః ॥ 156 ॥

ప్రాణేశ్వరీ :ప్రాణములకు అధీశ్వరి

ప్రాణదాత్రీ :ప్రాణములు ఇచ్చునది

పంచాశత్పీఠ రూపిణీ :శక్తిపీఠముల రూపమున వెలసినది

విశృంఖలా :యధేచ్ఛగా ఉండునది

వివిక్తస్థా :ఏకాంతముగా ఉండునది

వీరమాతా :వీరులకు తల్లి

వియత్ప్రసూ: :ఆకాశమును సృష్టించినది

ముకుందా, ముక్తి నిలయా, మూలవిగ్రహ రూపిణీ ।

భావజ్ఞా, భవరోగఘ్నీ భవచక్ర ప్రవర్తినీ ॥ 157 ॥

ముకుందా :విష్ణు రూపిణీ

ముక్తినిలయా :ముక్తికి స్థానమైనది

మూలవిగ్రహ రూపిణీ :అన్నింటికీ మూలమైనది

భావఙ్ఞా :సర్వజీవుల మానసిక భావములను తెల్సినది

భవరోగఘ్నీ :జన్మపరంపర అను రోగమును పోగొట్టునది

భవచక్ర ప్రవర్తినీ :లోకచక్రమును నడిపించునది.

ఛందస్సారా, శాస్త్రసారా, మంత్రసారా, తలోదరీ ।

ఉదారకీర్తి, రుద్దామవైభవా, వర్ణరూపిణీ ॥ 158 ॥

ఛందః సారా :వేదముల సారము

శాస్త్రసారా :వేదాంతాది సమస్త శాస్త్రముల సారము

మంత్రసారా :మంత్రముల యొక్క సారము

తలోదరీ :పలుచని ఉదరము కలిగినది

ఉదారకీర్తి :గొప్ప కీర్తి కలిగినది

రుద్దామవైభవా :అధికమైన వైభవము కలిగినది

వర్ణరూపిణీ :అక్షరరూపిణి

జన్మమృత్యు జరాతప్త జన విశ్రాంతి దాయినీ ।

సర్వోపనిష దుద్ఘుష్టా, శాంత్యతీత కళాత్మికా ॥ 159 ॥

జన్మ మృత్యు జరాతప్త జన విశ్రాంతిదాయినీ :చావు, పుట్టుకలు, ముసలితనము మొదలైన వాటితో బాధపడు జనులకు విశ్రాంతిని ఇచ్చునది.

సర్వోపనిషదుద్ఘుష్టా :అన్ని ఉపనిషత్తులచే చాటిచెప్పబడినది

శాంత్యతీత కళాత్మికా :శాంతికంటే అతీతమైన చిదానందస్వరూపిణి

గంభీరా, గగనాంతఃస్థా, గర్వితా, గానలోలుపా ।

కల్పనారహితా, కాష్ఠా, కాంతా, కాంతార్ధ విగ్రహా ॥ 160 ॥

గంభీరా :లోతైనది

గగనాంతస్థా :ఆకాశమునందు ఉండునది

గర్వితా :గర్వము కలిగినది

గానలోలుపా :సంగీతమునందు ప్రీతి కలిగినది

కల్పనారహితా :ఎట్టి కల్పన లేనిది

కాష్ఠా :కాలపరిగణనలో అత్యంత స్వల్పభాగము (రెప్పపాటుకన్న తక్కువ సమయం)

కాంతా :కాంతి కలిగినది

కాంతార్ధ విగ్రహ :కాంతుడైన ఈశ్వరునిలో అర్ధభాగము