గరుడ గమన తవ 

“గరుడ గమన తవ” అనేది శ్రీ మహావిష్ణువును స్తుతిస్తూ పాడే అద్భుతమైన భక్తి గీతం. గరుడ వాహనంపై విహరించే విష్ణుమూర్తి దివ్య మహిమను, ఆయన కరుణను ఈ కీర్తన ఎంతో అందంగా వర్ణిస్తుంది. భక్తి సంగీతంలో దీనికి ప్రత్యేక స్థానం ఉంది.

ఈ గీతాన్ని భక్తితో వినడం లేదా పఠించడం వల్ల మనస్సుకు ప్రశాంతత, ఆధ్యాత్మిక శక్తి మరియు శ్రీ మహావిష్ణువు అనుగ్రహం లభిస్తాయని విశ్వాసం. ఇది నెగెటివ్ శక్తులను తొలగించి, సానుకూలతను పెంపొందించే శక్తి కలిగినదిగా భావించబడుతుంది.

ఇది శ్రీ శృంగేరి భారతీ తీర్థ మహాస్వామి స్వరపరచిన శ్రీ మహావిష్ణు స్తోత్రం.

పల్లవి:

గరుడగమన తవ చరణకమలమిహ మనసి లసతు మమ నిత్యం |
మమ తాపమపాకురు దేవ, మమ పాపమపాకురు దేవ ||

ఓ గరుడ వాహనుడా! నీ పాదాలనే కమలాలు నా మనసునందు ఎల్లప్పుడూ విలసిల్లేటట్లు చేయుము.  నన్ను నా తాపముల నుండి, నా పాపముల  నుండి విముక్తి చేయుము.

జలజనయన విధినముచిహరణముఖ విబుధవినుతపదపద్మ |
మమ తాపమపాకురు దేవ, మమ పాపమపాకురు దేవ || 1 ||

ఓ కమలముల వంటి కన్నులు కలిగినవాడా! బ్రహ్మ, ఇంద్రుడు (నముచి అనే రాక్షసుని తలను నరికి సంహరించినవాడు), విద్వాంసులచేత స్తుతింపబడే నీ పాదపద్మాలకు మేము కూడా దాసులము. మా తాపముల నుండి, మా పాపముల నుండి మమ్ము విముక్తి చేయుము.

భుజగశయన భవ మదనజనక మమ జననమరణభయహారి |
మమ తాపమపాకురు దేవ, మమ పాపమపాకురు దేవ || 2 ||

ఆదిశేషుని శయ్యపై పడుకుని ఉండేవాడా, ప్రపంచానికి అవసరమైన ప్రేమను పంచేందుకు మన్మథునికి జన్మనిచ్చినవాడా, మా పుట్టుక మరియు చనిపోవడం అనే భయాలను పోగొట్టేవాడా, మా తాపముల నుండి,  మా పాపముల నుండి మమ్ము విముక్తి చేయుము.

శంఖచక్రధర దుష్టదైత్యహర సర్వలోకశరణ |
మమ తాపమపాకురు దేవ, మమ పాపమపాకురు దేవ || 3 ||

శంఖాన్ని మరియు చక్రాన్ని ఇరువైపులా ధరించినవాడా, దుష్టులైన రాక్షసులను సంహరించేవాడా, అన్ని లోకాలకు శరణు అయినవాడా, మా తాపముల నుండి, మా పాపముల నుండి మమ్ము విముక్తి చేయుము.

అగణితగుణగణ అశరణశరణద విదళితసురరిపుజాల |
మమ తాపమపాకురు దేవ, మమ పాపమపాకురు దేవ || 4 ||

లెక్కపెట్టలేనన్ని గుణాలను, అధికమైన అనుచర గణాలు (గుంపులు) కలిగినవాడా, ఆశ్రయం లేనివారికి ఆశ్రయం ఇచ్చేవాడా, దేవతల యొక్క శత్రువులను బంధించి వారిని చీల్చినవాడా, మా తాపముల నుండి, మా పాపముల నుండి మమ్ము విముక్తి చేయుము.

భక్తవర్యమిహ భూరికరుణయా పాహి భారతీతీర్థం |
మమ తాపమపాకురు దేవ, మమ పాపమపాకురు దేవ || 5 ||

భక్తులలో ముఖ్యుడిని, భారతీ-తీర్థుడినైన నన్ను ఈ భూలోకంలో ఉన్నంత కాలం అమితమైన  కరుణతో రక్షించు, నా తాపముల నుండి, నా  పాపముల నుండి నన్ను విముక్తి చేయుము.

ఇతి జగద్గురు శ్రీభారతీతీర్థస్వామినా విరచితం శ్రీమహావిష్ణు స్తోత్రమ్ ||

ఇలాంటి మరిన్ని స్తోత్రాలు, శ్లోకాలు, భక్తి విషయాల కోసం మా వెబ్‌సైట్‌లోని ఇతర పోస్ట్‌లను తప్పక చూడండి.

 ఎన్నో స్తోత్రాలు, వాటి అర్థాలు తెలుగులో తెలుసుకోవాలనుకుంటే మన “భారతీయ సంస్కృతి” YouTube ఛానల్‌ను సందర్శించండి. 🙏

👉 భారతీయ సంస్కృతి YouTube Channel Link

ఈ సమాచారాన్ని వీడియొ రూపంలో చూడాలనుకుంటే ఈ లింక్ ఓపెన్ చేసి వీడియొ చూడండి 👇👇👇. మరెంతో ఆధ్యాత్మిక, ధార్మిక సమాచారం కోసం భారతీయ సంస్కృతి ఛానల్ ను subscribe చేసుకోండి.