ముప్పై మూడు కోట్ల మంది దేవతలు

హిందువులకు ముప్పై మూడు కోట్ల మంది దేవుళ్లు ఉన్నారా? అంతమంది దేవుళ్ల పేర్లు గుర్తుపెట్టుకోవడం, వాళ్ళందరినీ పూజించడం అసలు సాధ్యమేనా? ఈ “33 కోట్లు” అనే పదంలో దాగిన అసలు రహస్యం ఏమిటి? ఈ ప్రశ్న మీకు ఎప్పుడైనా వచ్చిందా? అయితే, ఇప్పుడు ఆ అసలు సత్యాన్ని తెలుసుకుందాం.

హిందూ ధర్మం గురించి ఎక్కువగా వినిపించే ఒక అపోహ ఏమిటంటే — “హిందువులకు 33 కోట్ల దేవుళ్లు ఉన్నారు” అన్న మాట.
కానీ మన వేదాలు, శాస్త్రాలు చెప్పే అసలు సత్యం మాత్రం వేరు!

యజుర్వేదం, అధర్వణ వేదం, శతపథ బ్రాహ్మణం వంటి ప్రాచీన గ్రంథాలలో “33 కోటి” అంటే 33 కోట్ల సంఖ్య కాదు… “33 రకాల దైవ శక్తులు” అని అర్థం. ఇది కేవలం హిందూ శాస్త్రాలలోనే కాదు… బౌద్ధ, పారశీక సంప్రదాయ గ్రంథాలలో కూడా ఈ 33 దైవ శక్తుల ప్రస్తావన కనిపిస్తుంది.

ఇక్కడ మనం తెలుసుకోవాల్సిన అసలు రహస్యం ఏంటంటే… సంస్కృతంలో “కోటి” అనే పదానికి కేవలం “సంఖ్య” అనే అర్థమే కాదు… “వర్గం”, “సమూహం” అనే అర్థాలు కూడా ఉన్నాయి.

అంటే “33 కోటి దేవతలు” అంటే — సృష్టి నిర్వహణలో భాగమైన 33 దైవ శక్తుల సమూహం అని అర్థం.

మరి ఆ 33 దేవతలు ఎవరు?
ఏయే వర్గాలుగా విభజించబడ్డారు?
వారి ప్రత్యేకత ఏమిటి?
ఇప్పుడు ఒక్కొక్కటిగా తెలుసుకుందాం.

ఈ 33 వర్గాల దేవతలను ప్రధానంగా నాలుగు భాగాలుగా విభజించారు.

(1) ద్వాదశాదిత్యులు (12 మంది):

హిందూ పురాణాల ప్రకారం కశ్యప ప్రజాపతి, అదితి దంపతుల 12 మంది పుత్రులను ద్వాదశాదిత్యులు అంటారు. సంవత్సరంలోని 12 నెలల్లో సూర్యుని శక్తి ఒక్కో రూపంలో వ్యక్తమవుతుందని భావించి, ఒక్కో నెలకు ఒక్కో ఆదిత్యుడిని పేర్కొన్నారు.

• చైత్ర మాసం — ధాత
• వైశాఖ మాసం — ఆర్య
• జ్యేష్ఠ మాసం — మిత్రుడు
• ఆషాఢ మాసం — వరుణుడు
• శ్రావణ మాసం — ఇంద్రుడు
• భాద్రపద మాసం — వివస్వంతుడు
• ఆశ్వయుజ మాసం — త్వష్ట
• కార్తీక మాసం — విష్ణువు
• మార్గశిర మాసం — అంశుమంతుడు
• పుష్య మాసం — భగుడు
• మాఘ మాసం — పూషుడు
• ఫాల్గుణ మాసం — పర్జన్యుడు

(2) ఏకాదశ రుద్రులు (11 మంది):

పరమశివుడు లోక కళ్యాణం కోసం ధరించిన 11 అవతారాలనే “ఏకాదశ రుద్రులు” అంటారు.

వీరి పేర్లు:
మహాదేవుడు, శివుడు, మహా రుద్రుడు, శంకరుడు, నీలలోహితుడు, ఈశానుడు, విజయుడు, భీముడు, దేవదేవుడు, భవోద్భవుడు మరియు కపాలి.

మన దేహంలోని పది ప్రాణాలు, పదకొండవదైన ఆత్మ శరీరాన్ని విడిచిపెట్టేటప్పుడు బంధువులను రోదింపజేస్తాయి కాబట్టి వీటిని “రుద్రులు” అని పిలిచారని శాస్త్రాలు వివరిస్తాయి.

(3) అష్ట వసువులు (8 మంది):

దేవలోకంలో ఇంద్రుడికి, విష్ణుమూర్తికి సహాయంగా ఉండే శక్తివంతమైన దేవతలే అష్ట వసువులు. వీరు ప్రకృతి తత్వాలకు, పంచభూతాలకు ప్రతీకలు.

వారు:
ధరుడు (భూమి),
ధ్రువుడు (నక్షత్రాలు),
సోముడు (చంద్రుడు),
అహస్సు (పగలు),
అనిలుడు (వాయువు),
అనలుడు (అగ్ని),
ప్రత్యూషుడు (ఉషస్సు),
ప్రభాసుడు (సూర్యుడు).

(4) అశ్వినీ దేవతలు (ఇద్దరు):

అశ్వినీ దేవతలు దేవతల వైద్యులుగా ప్రసిద్ధి పొందారు. వీరి పేర్లు దస్రుడు మరియు నాసత్యుడు.

ఇక్కడ ఒక ఆసక్తికరమైన విషయం ఏమిటంటే — బృహదారణ్యక ఉపనిషత్తు వంటి ప్రాచీన వేదాంత గ్రంథాలలో, ఈ జాబితాలో చివరి ఇద్దరిగా అశ్వినీ దేవతలకు బదులుగా “ఇంద్రుడు, ప్రజాపతి”ని పేర్కొన్నారు.

ఉపనిషత్తులు తాత్విక కోణంలో ప్రకృతి శక్తులను వివరిస్తే, పురాణాలు మరియు ఇతిహాసాలు అశ్వినీ దేవతలకు ప్రత్యేక ప్రాధాన్యత ఇచ్చాయి.

ఇదే “33 కోటి దేవతలు” అనే భావన వెనుక ఉన్న అసలు అర్థం.

దైవము అంటే దివ్యత్వం కలిగిన వారు అని అర్థం. ప్రకృతిలోని పంచభూతాలకు, కాలానికి, ప్రాణశక్తికి ఒక్కొక్కరిని అధిష్టాన దేవతలుగా భావించి, కనుల ఎదుట కనిపించే ప్రకృతినే దైవంగా ఆరాధించడమే సనాతన ధర్మం యొక్క విశిష్టత.

ఇలాంటి మరిన్ని స్తోత్రాలు, శ్లోకాలు, భక్తి విషయాల కోసం మా వెబ్‌సైట్‌లోని ఇతర పోస్ట్‌లను తప్పక చూడండి.

ఎన్నో స్తోత్రాలు, వాటి అర్థాలు తెలుగులో తెలుసుకోవాలనుకుంటే మన “భారతీయ సంస్కృతి” YouTube ఛానల్‌ను సందర్శించండి. 🙏

👉 భారతీయ సంస్కృతి YouTube Channel Link

ఈ సమాచారాన్ని వీడియొ రూపంలో చూడాలనుకుంటే ఈ లింక్ ఓపెన్ చేసి వీడియొ చూడండి 👇👇👇. మరెంతో ఆధ్యాత్మిక, ధార్మిక సమాచారం కోసం భారతీయ సంస్కృతి ఛానల్ ను subscribe చేసుకోండి.