కార్తీక పురాణం 1 వ రోజు పారాయణం
పూర్వం నైమిశారణ్యంలో సూత మహర్షి రాగా, ఆయనను శౌనకాది మహర్షులు సత్కరించి సంతుష్టులయ్యారు. అనంతరం, “కైవల్యదాయకమైన ఈ కార్తీక మాస మహాత్మ్యాన్ని మాకు వినిపించి మమ్మల్ని ధన్యుల్ని చేయండి” అని ప్రార్థించారు.
వారి కోరికను మన్నించిన వ్యాసశిష్యుడైన సూత మహర్షి ఇలా అన్నాడు:
“మా గురువుగారైన భగవాన్ వేదవ్యాస మహర్షులు ఈ కార్తీక మహత్యాన్ని అష్టాదశ పురాణాలలోని స్కాంద పురాణం, పద్మ పురాణం రెండింటిలోనూ వివరించారు. స్కాంద పురాణంలో రాజర్షి జనకునికి, పద్మ పురాణంలో శ్రీకృష్ణ పరమాత్మ సత్యభామకు ఈ కార్తీక మహాత్మ్యాన్ని సవిస్తరంగా చెప్పారు.”
అదృష్టవశాత్తు నేటి నుంచే కార్తీక మాసం ప్రారంభమవుతున్నందున, ఈ మాసమంతా ప్రతిరోజూ నిత్య పారాయణంగా కార్తీక పురాణ శ్రవణం చేద్దాం. ఇప్పుడు స్కాంద పురాణంలోని వశిష్ట ప్రోక్తమైన కార్తీక మహత్యాన్ని వినండి అంటూ కథను ప్రారంభించాడు.
ఒకసారి వశిష్ట మహర్షి సిద్ధాశ్రమంలో జరుగుతున్న యజ్ఞకార్యాల నిమిత్తం జనక మహారాజు వద్దకు వెళ్లాడు. జనకుడు మహర్షిని ఆత్మీయంగా ఆహ్వానించి, మర్యాదలతో సత్కరించి ఆయన వచ్చిన కారణాన్ని అడిగాడు.
అందుకు వశిష్ట మహర్షి యజ్ఞం కోసం సహాయం కోరగా, జనకుడు ఆనందంగా అంగీకరించి, “మీ యజ్ఞానికి ఎంత ధనం కావాలన్నా ఇస్తాను. కానీ సర్వపాపహరణమైన ధర్మసూక్ష్మాన్ని నాకు వివరించండి. అన్ని మాసాలలో కార్తీకమాసం అత్యంత మహిమాన్వితమని అంటారు. ఆ వ్రతం ఎందుకు అంత శ్రేష్ఠమైనది? దాని విశిష్టత ఏమిటి?” అని ప్రశ్నించాడు.
దీనికి వశిష్ట మహర్షి ఇలా ప్రవచించాడు:
“ఓ జనక మహారాజా! పూర్వజన్మలలో ఎంతో పుణ్యం చేసినవారికే తత్వశుద్ధి కలుగుతుంది. అలాంటి పవిత్ర మనస్సు ఉన్నవారికే కార్తీక మహాత్మ్యం వినాలనే కోరిక కలుగుతుంది. నీవు అడిగిన విషయాలను ఇప్పుడు విను.
కార్తీకమాసంలో సూర్యుడు తులా రాశిలో సంచరిస్తున్నప్పుడు, భక్తితో ఆచరించే స్నానం, దానం, జపం, పూజలు విశేష ఫలితాలను ఇస్తాయి. కార్తీక వ్రతాన్ని తులా సంక్రమణ సమయంలో ప్రారంభించాలి.
ముందుగా ‘సర్వపాపహరం పుణ్యం వ్రతం కార్తీక సంభవం నిర్విఘ్నం కురుమే దేవా, దామోదర నమోస్తుతే’ అని సంకల్పించి వ్రతాన్ని ఆచరించాలి.
సూర్యోదయ సమయంలో నదిలో స్నానం చేయాలి. సూర్యుడు తులా రాశిలో ప్రవేశించినపుడు గంగాదేవి సమస్త నదుల్లో ప్రవహిస్తుందని విశ్వాసం. కాబట్టి ఏ నదిలో స్నానం చేసినా గంగాస్నాన ఫలితం లభిస్తుంది.
స్నానం అనంతరం దేవతలకు, పితృదేవతలకు తర్పణం ఇవ్వాలి. తరువాత అఘమర్షణ మంత్రాన్ని జపించి, తీరం చేరాలి. తడిసిన వస్త్రాలను మార్చి, శుభ్రమైన తెల్లని వస్త్రాలను ధరించి గాయత్రీ మంత్రాన్ని జపించాలి.
ఆ తరువాత ఉపాసన చేసి, తన ఇంటి తోటలోనుండి తెచ్చిన పుష్పాలతో శంఖచక్రధారి అయిన శ్రీమహావిష్ణువును, సాలగ్రామాన్ని షోడశోపచారాలతో పూజించాలి.
తరువాత కార్తీక పురాణాన్ని చదవడం లేదా వినడం చేయాలి. అనంతరం గృహానికి చేరి దేవతార్చన, వైశ్వదేవాది కర్మలను పూర్తి చేసి భోజనం చేయాలి. భోజనం తరువాత మళ్లీ పురాణ శ్రవణం చేయాలి.”
సాయంకాలం కాగానే ఇతర వ్యాపారాలన్నిటిని విరమించుకొని, శివాలయంలో గాని, విష్ణు ఆలయంలో గాని యథాశక్తి దీపాలు వెలిగించి, అక్కడ స్వామిని ఆరాధించి, భక్తితో నైవేద్యం సమర్పించి, శుద్ధ వాక్కులతో హరిని స్తుతించి నమస్కరించుకోవాలి.
కార్తీక మాసమంతా ఈ విధంగా వ్రతాన్ని ఆచరించిన వారు పునర్జన్మ రహితమైన వైకుంఠాన్ని పొందుతారు. పూర్వజన్మలలో చేసిన పాపాలన్నీ కూడా కార్తీక వ్రతం వలన నశించిపోతాయి.
వర్ణాశ్రమ, లింగ, వయోభేదం లేకుండా ఎవరైనా ఈ వ్రతాన్ని ఆచరించవచ్చు. ఓ జనక మహారాజా! తనకు తానుగా ఈ వ్రతాన్ని ఆచరించలేకపోయినా, ఇతరులు చేస్తుండగా చూసి అసూయ లేకుండా ఆనందించినా కూడా ఆ రోజు చేసిన పాపాలన్నీ విష్ణు కృపతో నశించిపోతాయి.
జనక మహారాజా! వినినంత మాత్రాననే మనో, వాక్కు, కాయముల ద్వారా చేసిన సర్వ పాపాలను హరించే కార్తీక మహత్యాన్ని శ్రద్ధగా విను.
ఈ నెలలో శివునికి ప్రీతికరమైన సోమవార వ్రతాన్ని ఆచరించినవాడు తప్పక కైలాసాన్ని పొందుతాడు. కార్తీక మాసంలో వచ్చే ఏ సోమవారం నాడైనా స్నానం, జపాది కర్మలను ఆచరించిన వాడు వెయ్యి అశ్వమేధ యాగాల ఫలాన్ని పొందుతాడు.
ఈ సోమవార వ్రత విధానం ఆరు రకాలుగా ఉంటుంది:
ఉపవాసం, ఏకభుక్తం, నక్తం, అయాచితం, స్నానం, తిలదానం
శక్తి ఉన్నవారు కార్తీక సోమవారం నాడు పగలంతా ఉపవాసంగా ఉండి, సాయంకాలం శివాభిషేకం చేసి, నక్షత్ర దర్శనానంతరం తులసీ తీర్థం మాత్రమే సేవించాలి.
ఉదయాన్నే స్నానం, దానం, జపాలు యథావిధిగా చేసి, మధ్యాహ్నం భోజనం చేసి, రాత్రి భోజనానికి బదులుగా తులసీ తీర్థం మాత్రమే తీసుకోవచ్చు.
లేదా పగలంతా ఉపవాసంగా ఉండి, రాత్రి నక్షత్ర దర్శనం తర్వాత భోజనం గాని, ఉపాహారం గాని స్వీకరించవచ్చు.
అయాచితం అంటే తనంతట తాను భోజనం కోసం ప్రయత్నించకుండా, ఎవరైనా స్వయంగా పిలిచి భోజనం పెడితే మాత్రమే స్వీకరించడం అయాచితం.
పై విధానాలలో ఏదీ చేయలేని వారు కనీసం స్నానం, జపం చేసినా సరిపోతుంది. అవి కూడా సాధ్యంకాకపోతే కార్తీక సోమవారం నాడు నువ్వులు (తిలాలు) దానం చేసినా ఫలితం లభిస్తుంది.
ఈ ఆరు విధానాలలో ఏదో ఒకటి ఆచరించినా కార్తీక సోమవార వ్రతం చేసినట్లే. కానీ తెలిసి కూడా ఏ ఒక్క దానిని ఆచరించని వారు ఎనిమిది యుగాల పాటు కుంభీపాక, రౌరవాది నరకాలను అనుభవిస్తారని శాస్త్రం చెబుతోంది.
ఈ వ్రతాన్ని ఆచరించడం ద్వారా స్త్రీలు, అనాథలు సహా ఎవరైనా విష్ణు సాయుజ్యాన్ని పొందగలరు..
కార్తీక మాసంలో వచ్చే ప్రతి సోమవారం నాడు పగలు ఉపవాసంగా ఉండి, రాత్రి నక్షత్ర దర్శనం తర్వాత మాత్రమే భోజనం చేస్తూ, ఆ రోజంతా భగవద్ధ్యానంలో గడిపిన వారు తప్పకుండా శివ సాయుజ్యాన్ని పొందుతారు.
సోమవార వ్రతాన్ని ఆచరించే వారు నమక-చమక సహితంగా శివాభిషేకం చేయడం ముఖ్యమని తెలుసుకోవాలి.
సోమవార వ్రత ఫలితాన్ని వివరించే కథ
ఈ వ్రత ఫలితాన్ని తెలియజేసే ఒక కథను విను.
పూర్వం ఒక బ్రాహ్మణునికి నిష్ఠురి అనే కుమార్తె ఉండేది. ఆమె అందంగా ఉన్నప్పటికీ, సద్గుణాలు మాత్రం లేవు. దుష్ట స్వభావం, కఠిన ప్రవర్తన వల్ల చుట్టుపక్కలవారు ఆమెను ‘కర్కశ’ అని పిలిచేవారు.
బాధ్యతగా ఆమె తండ్రి, సౌరాష్ట్ర దేశానికి చెందిన మిత్రశర్మ అనే సద్గుణవంతుడైన బ్రాహ్మణునికి ఆమెను వివాహం చేసి తన కర్తవ్యాన్ని ముగించాడు.
మిత్రశర్మ విద్యావంతుడు, సద్గుణసంపన్నుడు, సదాచార పరుడు, సహృదయుడు. కానీ కర్కశ మాత్రం తన ఇష్టానుసారంగా ప్రవర్తిస్తూ, ప్రతిరోజూ తన భర్తను తిడుతూ, కొడుతూ ఉండేది.
అయినప్పటికీ, తన మనసుకు నచ్చినది కావడం వల్ల మోహాన్ని విడిచిపెట్టలేక, భార్యను పరిత్యజించడం తన వంశానికి అపకీర్తి అని భావించిన మిత్రశర్మ, కర్కశ పెట్టే కఠిన హింసలన్నింటిని భరిస్తూనే ఉండేవాడు. కానీ ఎప్పుడూ ఆమెను శిక్షించలేదు.
కర్కశ అనేక పరపురుషులతో అక్రమ సంబంధాలు పెట్టుకొని, భర్తను అవమానించేది. సాధారణంగా అటువంటి పరిస్థితిని ఎవరూ సహించరు, కానీ మిత్రశర్మ మాత్రం సహనంతో ఉండేవాడు.
ఒకానొక రోజు, ఆమెతో అక్రమ సంబంధం పెట్టుకున్న వారిలో ఒకడు, “నీ భర్త బ్రతికి ఉండడం వల్ల మనం తరచూ కలుసుకోలేకపోతున్నాం” అని చెప్పాడు. దాంతో కర్కశ దురాలోచనకు లోనై, ఆ రాత్రే నిద్రిస్తున్న భర్త శిరస్సును నరికి చంపి, శవాన్ని తానే తీసుకెళ్లి ఒక పాడుబడిన బావిలో పడవేసింది.
ఈ దారుణాన్ని గమనించిన అత్తమామలు, ఆమెకు ఉన్న విటుల బలం కారణంగా ఏమి చేయలేక, తామే ఇల్లు వదిలి వెళ్లిపోయారు.
దాంతో మరింత స్వేచ్ఛ పొందిన కర్కశ అనేక పురుషులతో సంబంధాలు కొనసాగిస్తూ, సంసారస్త్రీలను కూడా తన మాటలతో భ్రమింపజేసి సంపాదన చేసేది.
కాలక్రమేణా ఆమె బలం తగ్గింది, యవ్వనం క్షీణించింది. శరీరం బలహీనమై అనేక వ్యాధులు సోకాయి. ఆదాయం తగ్గిపోయింది. చివరకు తినడానికి అన్నం, కప్పుకోవడానికి బట్టలు కూడా లేక దయనీయ స్థితికి చేరి మరణించింది. ఆమె మృతదేహాన్ని చూసుకునే వారే లేకపోయారు.
యమదూతలు ఆమె ప్రాణాన్ని పాశాలతో బంధించి నరకానికి తీసుకెళ్లి, దారుణమైన శిక్షలను విధించారు.
భర్తను విస్మరించి పరపురుషులను ఆలింగనం చేసిన పాపానికి, మండుతున్న ఇనుప స్తంభాన్ని కౌగిలించుకునే శిక్ష విధించారు. అనంతరం కుంభీపాక నరకానికి పంపించారు.
ఆమె పాపాల కారణంగా, ముందరి పది తరాలు, తరువాతి పది తరాలు, ఆమెను కలుపుకొని మొత్తం ఇరవై ఒక తరాలు కూడా కుంభీపాక నరకంలో బాధలను అనుభవించాల్సి వచ్చింది.
నరకానుభవాల అనంతరం ఆమె పదిహేనుసార్లు భూమిపై కుక్కగా జన్మించింది. పదిహేనవ సారి కళింగ దేశంలో ఒక బ్రాహ్మణుని ఇంటి వద్ద కుక్కగా జీవిస్తోంది.
ఒక కార్తీక సోమవారం నాడు, ఆ బ్రాహ్మణుడు పగలు ఉపవాసం ఉండి, శివాభిషేకం చేసి, నక్షత్ర దర్శనానంతరం భోజనానికి సిద్ధమై ఇంటి బయట బలి పెట్టాడు.
ఆహారం దొరకక బాధపడుతున్న ఆ కుక్క, ప్రదోష సమయంలో ఆ బలి అన్నాన్ని తిని, పూర్వజన్మ స్మృతి పొందింది. వెంటనే మానవ వాణితో విలపించింది.
ఆ శబ్దం విని వచ్చిన బ్రాహ్మణుడు ఆశ్చర్యపోయి, “నీవెవరు? ఏ పాపం చేసావు? నిన్ను ఎలా రక్షించగలను?” అని అడిగాడు.
అందుకు ఆ కుక్క ఇలా చెప్పింది:
“ఓ బ్రాహ్మణుడా! పూర్వజన్మలో నేను కర్కశ అనే స్త్రీని. కామాంధురాలై భర్తను హత్య చేసి, అనేక పాపాలు చేసి నరకయాతనలను అనుభవించాను. ఇప్పటివరకు పద్నాలుగు సార్లు కుక్కగా జన్మించాను. ఇది నా పదిహేనవ జన్మ. ఇప్పుడు ఈ పూర్వస్మృతి ఎందుకు కలిగిందో తెలియడం లేదు. దయచేసి నన్ను రక్షించండి.”
బ్రాహ్మణుడు జ్ఞానదృష్టితో అన్నింటిని గ్రహించి, ఇలా అన్నాడు:
“ఈ రోజు కార్తీక సోమవారం. ప్రదోష సమయంలో నేను సమర్పించిన బలి అన్నం నీవు తిన్నావు. అందువల్ల నీకు పూర్వజన్మ స్మృతి కలిగింది.”
ఆ కుక్క మళ్లీ ప్రార్థించింది: “ఓ దయామయుడా! నాకు మోక్షం ఎలా లభిస్తుంది?”
దయాగుణసంపన్నుడైన ఆ బ్రాహ్మణుడు, తాను చేసిన అనేక కార్తీక సోమవార వ్రతాల పుణ్యఫలంలో కొంత భాగాన్ని ఆమెకు దానం చేశాడు.
దాంతో ఆ కుక్క తన శునకదేహాన్ని విడిచిపెట్టి, దివ్య స్త్రీరూపాన్ని పొందింది. అనంతరం పితృదేవతలతో కలిసి కైలాసానికి చేరింది.
కాబట్టి, ఓ జనక మహారాజా! శ్రేయస్సును ప్రసాదించే ఈ కార్తీక సోమవార వ్రతాన్ని తప్పనిసరిగా ఆచరించు అని వశిష్ట మహర్షి ఉపదేశించాడు.
ఇలా వశిష్ట మహర్షి జనక మహారాజుకు కార్తీక సోమవార వ్రత మహిమను, దాని విశిష్టతను, కర్కశ కథ ద్వారా ఆ వ్రతం యొక్క మహత్తును వివరించాడు.
కార్తీక మాసంలో ప్రతిరోజూ పురాణాన్ని శ్రద్ధగా వినడం, చదవడం, ఆచరించడం ద్వారా మనలో భక్తి, ధర్మచింతన పెంపొందుతాయని పెద్దలు చెబుతారు.
ఇది కార్తీక పురాణంలోని మొదటి రోజు పారాయణం.
ఇలాంటి మరిన్ని స్తోత్రాలు, శ్లోకాలు, భక్తి విషయాల కోసం మా వెబ్‌సైట్‌లోని ఇతర పోస్ట్‌లను తప్పక చూడండి.
ఎన్నో స్తోత్రాలు, వాటి అర్థాలు తెలుగులో తెలుసుకోవాలనుకుంటే మన “భారతీయ సంస్కృతి” YouTube ఛానల్‌ను సందర్శించండి. 🙏
