లలితా సహస్రనామ ఫలశృతి 61-70  శ్లోకాలు తెలుగులో అర్థం

శ్రీలలితా సహస్రనామంలోని ఫలశ్రుతి భాగం, ఈ దివ్య నామాలను భక్తిశ్రద్ధలతో పారాయణం చేయడం వల్ల కలిగే మహిమలను వివరిస్తుంది. ఫలశ్రుతి ద్వారా ఈ సహస్రనామం కేవలం స్తోత్రమే కాక, భక్తుల జీవితాలను ఆధ్యాత్మికంగా మరియు లౌకికంగా ఉన్నత స్థితికి చేర్చే దివ్య సాధనమని తెలియజేయబడుతుంది. పరాశక్తి అయిన శ్రీలలితా మహాత్రిపురసుందరీ కృపను పొందడానికి ఈ నామాల జపం అత్యంత శ్రేష్ఠమైన మార్గంగా శాస్త్రాలు పేర్కొన్నాయి.

భక్తితో శ్రీలలితా సహస్రనామ ఫలశ్రుతిని చదవడం లేదా వినడం ద్వారా పాపక్షయం, ఆరోగ్యం, ఐశ్వర్యం, సంతానసౌభాగ్యం, విద్యా ప్రాప్తి, శత్రువుల నుండి రక్షణ వంటి అనేక శుభఫలితాలు లభిస్తాయని చెప్పబడింది. అంతేకాక, పరమాత్మసాక్షాత్కారం మరియు మోక్షప్రాప్తికి కూడా ఈ స్తోత్రం దోహదపడుతుందని ఫలశ్రుతి వివరిస్తుంది. ఇప్పుడు ఈ ఫలశ్రుతి శ్లోకాల యొక్క తెలుగు అర్థాన్ని తెలుసుకుందాం.

సర్వాన్ కామానవాప్యేహ సర్వసౌభాగ్యసంయుతః 
పుత్రపౌత్రాదిసంయుక్తో భుక్త్వా భోగాన్యథేప్సితాన్ || 61 ||

అంతే శ్రీలలితాదేవ్యాః సాయుజ్యమతిదుర్లభమ్ 
ప్రార్థనీయం శివాద్యైశ్చ ప్రాప్నోత్యేవ న సంశయః || 62 ||

శ్రీచక్రమందు శుక్రవారమునాడు సహస్ర నామాలతో త్రిపుర సుందరిని పూజించిన వారు, ఈ భూలోకములోని అన్ని కోరికలను పొంది, సకల సౌభాగ్యములు కలవాడై, కొడుకులతో మనుమలతో కూడి కోరిన భోగములన్నింటినీ అనుభవించును. మరణించిన తరువాత- ఎవరికీ పొందశక్యము కానిది, శివాదులచే కూడా ప్రార్థింపదగినది అయిన శ్రీ లలితా సాయుజ్యమోక్షమును అనగా కైవల్యమును తప్పక పొందుతాడు. ఈ విషయంలో సందేహము లేదు.

యః సహస్రం బ్రాహ్మణానాం ఏభిర్నామసహస్రకైః 
సమర్చ్య భోజయేద్భక్త్యా పాయసాపూపషడ్రసైః || 63 ||

తస్మై ప్రీణాతి లలితా స్వసామ్రాజ్యం ప్రయచ్ఛతి 
న తస్య దుర్లభం వస్తు త్రిషు లోకేషు విద్యతే || 64 ||

పరమాన్నము, అప్పములు, షడ్రుచులు గల పదార్థములతో, ఎవరు వెయ్యి మంది బ్రాహ్మణులను భక్తితో పూజించి భోజనము పెట్టునో, దానివలన లలితాదేవికి ప్రేమ కలిగి తన సామ్రాజ్యమును ఇచ్చును. అట్టివాడు మూడు లోకములలో పొందశక్యముగాని వస్తువులు ఉండవు.

నిష్కామః కీర్తయేద్యస్తు నామసాహస్రముత్తమమ్ 
బ్రహ్మజ్ఞానమవాప్నోతి యేన ముచ్యేత బంధనాత్ || 65 ||

శ్రేష్టమైన శ్రీదేవీ సహస్రనామాలను కోరికలు లేకుండా పారాయణము చేసినవాడు- సంసార బంధమునుండి విడిపించగలిగే బ్రహ్మజ్ఞానమును పొందుచున్నాడు.

ధనార్థీ ధనమాప్నోతి యశోఽర్థీ ప్రాప్నుయాద్యశః 
విద్యార్థీ చాప్నుయాద్విద్యాం నామసాహస్రకీర్తనాత్ || 66 ||

ఈ సహస్ర నామ పారాయణం చేయువాడు- ధనమును కోరువాడు ధనమును, కీర్తిని కోరువాడు కీర్తిని, విద్యార్థి విద్యను పొందుతున్నాడు.

నానేన సదృశం స్తోత్రం భోగమోక్షప్రదం మునే 
కీర్తనీయమిదం తస్మాత్  భోగమోక్షార్థిభిర్నరైః || 67 ||

ఈ సహస్రనామ స్తోత్రము ఏ కోరికలూ లేకుండా పారాయణ చేయడం ప్రారంభించి, కొంత కాలమైన తరువాత దానిని విడిచి కోరికతో పారాయణము చేసినా ఏ తప్పూ లేదు. ఏ కోరికతో చేసినా ఆ కోరిక తప్పక నెరవేరుతుంది. భోగమక్కరలేని వారికి మోక్షము, మోక్షమక్కర లేనివారికి భోగము, రెండునూ కావలసిన వారికి ఈ రెండూ లభించును.

చతురాశ్రమనిష్ఠైశ్చ కీర్తనీయమిదం సదా 
స్వధర్మసమనుష్ఠాన వైకల్యపరిపూర్తయే || 68 ||

బ్రహ్మచారి, గృహస్థుడు, వానప్రస్థుడు, సన్యాసి అనే నాలుగు ఆశ్రమముల వారికి, వారివారి ధర్మాలను ఆచరించేటపుడు వైగుణ్యము, వైకల్యము కలిగితే దానివలన అయ్యే దోషాలు ఈ నామ పారాయణ చేయడం వలన నశించి, ధర్మకార్యము పరిపూర్ణమవుతుంది. కనుక నాలుగు ఆశ్రమములవారు ఈ నామ పారాయణము ఎప్పుడూ ఆచరించాలి.

కలౌ పాపైకబహుళే ధర్మానుష్ఠానవర్జితే  
నామానుకీర్తనం ముక్త్వా నృణాం నాన్యత్పరాయణమ్ || 69 ||

అనేక పాపములతో నిండినది, వర్ణాశ్రమ ఆచారములచే విడువబడినది అయిన కలియుగమందు- ఈ సహస్ర నామ పారాయణం తప్ప, మనుష్యులకు వేరొక దిక్కు (దారి) లేదు.

లౌకికాద్వచనాన్ముఖ్యం విష్ణునామానుకీర్తనమ్ 
విష్ణునామ సహస్రాచ్చ శివనామైకముత్తమమ్ || 70 ||

శివనామ సహస్రాచ్చ దేవ్యా నామైకముత్తమమ్  

లోకములో ఉచ్చరించబడిన అన్ని మాటల కంటే విష్ణు నామం పుణ్యప్రదమైనది. విష్ణు సహస్ర నామముల కంటే, ఒక్క శివనామము ఉత్తమమైనది, వెయ్యి శివ నామముల కంటే, ఒక్క లలితాదేవి నామము ఉత్తమమైనది, శ్రేష్టమైనది.

ఇలాంటి మరిన్ని స్తోత్రాలు, శ్లోకాలు, భక్తి విషయాల కోసం మా వెబ్‌సైట్‌లోని ఇతర పోస్ట్‌లను తప్పక చూడండి.

 ఎన్నో స్తోత్రాలు, వాటి అర్థాలు తెలుగులో తెలుసుకోవాలనుకుంటే మన “భారతీయ సంస్కృతి” YouTube ఛానల్‌ను సందర్శించండి. 🙏

👉 భారతీయ సంస్కృతి YouTube Channel Link

ఈ సమాచారాన్ని వీడియొ రూపంలో చూడాలనుకుంటే ఈ లింక్ ఓపెన్ చేసి వీడియొ చూడండి 👇👇👇. మరెంతో ఆధ్యాత్మిక, ధార్మిక సమాచారం కోసం భారతీయ సంస్కృతి ఛానల్ ను subscribe చేసుకోండి.