వైశాఖ పురాణం 13 వ అధ్యాయము

అశూన్య శయన వ్రతము

నారద మహర్షి అంబరీష మహారాజుతో “రాజా! శ్రుతదేవ మహాముని మాటలు విన్న శ్రుతకీర్తి మహారాజు, రతీదేవి ఆచరించిన ‘అశూన్యశయన వ్రతం’ గురించి వివరంగా చెప్పమని అడిగారు. అప్పుడు శ్రుతదేవుడు వివరించిన ఆ వ్రత విధానాన్ని నీకు కూడా వివరిస్తాను విను.”

ఈ వ్రతం సర్వ పాపాలను పోగొట్టే గొప్ప శక్తి కలది. స్వయంగా శ్రీమన్నారాయణుడు లక్ష్మీదేవికి ఈ వ్రత రహస్యాన్ని చెప్పాడు. ఇది ఆచరించిన వారికి శ్రీహరి లక్ష్మీ సమేతుడై ప్రసన్నుడవుతాడు. ముఖ్యంగా గృహస్థులు ఈ వ్రతాన్ని పాటిస్తే వారి వైవాహిక జీవితం సుఖసంతోషాలతో, అపారమైన సంపదలతో వర్ధిల్లుతుంది.

ఈ వ్రతాన్ని శ్రావణ మాసం శుద్ధ విదియ నాడు ప్రారంభించాలి. వ్రతం చేసేవారు నాలుగు నెలల పాటు కేవలం హవిష్యాన్నాన్ని (పాయసం వంటి పవిత్ర ఆహారం) మాత్రమే భుజించాలి.

మొదటి నాలుగు నెలలైన  శ్రావణ, భాద్రపద, ఆశ్వయుజ, కార్తీక మాసాల్లో లక్ష్మీ సమేతుడైన శ్రీమహావిష్ణువును పూజించాలి. బంగారంతో లేదా వెండితో చేసిన లక్ష్మీనారాయణ ప్రతిమను ఉంచి, పట్టు వస్త్రాలు, తులసి మాలలు, తెల్లని సుగంధ ద్రవ్యాలతో అలంకరించి పూజించాలి. నాలుగు రకాల పిండి వంటలను వండి దేవుడికి నివేదించాలి. పూజ ముగిశాక, సంసారమున్న సద్బ్రాహ్మణుడికి ఆ పిండి వంటలను ‘వాయనం’గా ఇవ్వాలి. బ్రాహ్మణ భోజనం పెట్టి, దంపతులను పూజించి, వస్త్రాలు మరియు శయ్యను (మంచం) దానమివ్వాలి.

తర్వాతి నాలుగు నెలలు (మార్గశిర, పుష్య, మాఘ, ఫాల్గుణ మాసాలు) కూడా లక్ష్మీనారాయణుడిని పూజిస్తూ, ‘విష్ణు గాయత్రి’ మంత్రంతో హోమం చేయాలి. ఈ కాలం మధ్యలో శ్రీకృష్ణుని ప్రతిమను దానమివ్వాలి.

చివరి నాలుగు నెలలు (చైత్ర, వైశాఖ, జ్యేష్ఠ, ఆషాఢ మాసాలు) శ్రీహరిని రుక్మిణీ సహితంగా లేదా భూదేవి సహితంగా ఎర్రని పూలతో పూజించాలి. పంచామృతాలు, పాయసం, నేతితో వండిన బూరెలను నైవేద్యంగా పెట్టాలి. పురుష సూక్త మంత్రాలతో హోమం చేయాలి. ఆషాఢ శుద్ధ విదియ నాడు అష్టాక్షరీ మంత్రంతో హోమం చేసి వ్రతాన్ని ముగించాలి. వ్రతం చివరలో వెండి వరాహమూర్తిని దానమివ్వాలి.

కేశవ నామాదులైన పన్నెండు పేర్లతో (ద్వాదశ నామాలు) పన్నెండు మంది బ్రాహ్మణులను పిలిచి, వారికి వస్త్రాలు, అలంకారాలు, దక్షిణ ఇచ్చి సత్కరించాలి. ఒక్కొక్క బ్రాహ్మణుడికి 12 చొప్పున నేతి బూరెలను దానమివ్వాలి. ఆ తర్వాత ఒక మంచం మీద పరుపు వేసి, దానిపై ఒక కంచు పాత్రను ఉంచి, అందులో సర్వాలంకార భూషితమైన లక్ష్మీనారాయణ ప్రతిమను ఉంచాలి. దీనిని విష్ణు భక్తుడైన ఆచార్య బ్రాహ్మణుడికి దానమిచ్చి, బ్రాహ్మణ సమారాధన చేయాలి. అందరూ భోజనం చేశాక మాత్రమే వ్రతం చేసిన వారు భుజించాలి.

ఈ వ్రతాన్ని భార్య లేని పురుషుడు, భర్తను కోల్పోయిన స్త్రీ లేదా దంపతులు.. ఎవరైనా చేసుకోవచ్చు. దీనివల్ల ఆయురారోగ్యాలు, భోగభాగ్యాలు కలుగుతాయి. భగవంతుని అనుగ్రహంతో మోక్షం కూడా సులభంగా సిద్ధిస్తుంది.

శ్రుతదేవ మహాముని ఇంత వివరంగా చెప్పినప్పటికీ, శ్రుతకీర్తి మహారాజుకు ఇంకా తృప్తి కలగలేదు. ఆయన మళ్ళీ “మునీశ్వరా! వైశాఖ మాసంలో ఛత్రదానము (గొడుగు దానం) చేయడం వల్ల కలిగే పుణ్యం గురించి కూడా దయచేసి వివరించండి. ఈ వ్రత విశేషాలు ఎన్ని విన్నా నాకు ఇంకా వినాలనిపిస్తోంది” అని అడిగాడు.

వైశాఖ పురాణం పదమూడవ అధ్యాయం సంపూర్ణం.

పదునాలుగవ అధ్యాయం కోసం ఇక్కడ క్లిక్ చేయండి 

వైశాఖ పురాణం 1-30 అధ్యాయాలు

వైశాఖ పురాణము (Vaisakha Puranam) లోని అధ్యాయములు:

1వ అధ్యాయం – వైశాఖమాస ప్రశంస

2వ అధ్యాయం – వైశాఖ మాసమున చేయవలసిన వివిధ దానములు – వాటి  ఫలితములు

3వ అధ్యాయం – వివిధ దానములు – వాటి మహత్యములు

4వ అధ్యాయం – వైశాఖ ధర్మ ప్రశంస

5వ అధ్యాయం – వైశాఖమాస విశిష్టత

6వ అధ్యాయం – జలదాన మహత్యము – గృహగోధికా కథ

7వ అధ్యాయం – వైశాఖమాస  దానములు

8వ అధ్యాయం – పిశాచ మోక్షము

9వ అధ్యాయం – సతీ దేహత్యాగము

10వ అధ్యాయం – దక్షయజ్ఞ నాశము – కామదహనము

11వ అధ్యాయం – రతి దుఃఖము – దేవతల ఊరడింపు

12వ అధ్యాయం – కుమార జననము

13వ అధ్యాయం – అశూన్య శయన వ్రతము

14వ అధ్యాయం – ఛత్రదాన మహిమ

15వ అధ్యాయం – వైశాఖవ్రత మహిమ

16వ అధ్యాయం – యముని పరాజయము

17వ అధ్యాయం – యమ దుఃఖ నిరూపణము

18వ అధ్యాయం – విష్ణువు యముని ఊరడించుట

19వ అధ్యాయం – పిశాచత్వ విముక్తి

20వ అధ్యాయం – పాంచాలరాజు రాజ్యప్రాప్తి

21వ అధ్యాయం – పాంచాలరాజు సాయుజ్యము

22వ అధ్యాయం – దంతిల కోహల శాపవిముక్తి

23వ అధ్యాయం – కిరాతుని పూర్వజన్మ

24వ అధ్యాయం – వాయుశాపము

25వ అధ్యాయం – భాగవత ధర్మములు

26వ అధ్యాయం – వాల్మీకి జన్మ

27వ అధ్యాయం – కలిధర్మములు – పితృముక్తి

28వ అధ్యాయం – అక్షయతృతీయ విశిష్టత

29వ అధ్యాయం – శునీ మోక్షప్రాప్తి

30వ అధ్యాయం – పుష్కరిణి – ఫలశ్రుతి

శ్రీ మహావిష్ణువుకు ప్రీతిపాత్రమైన వైశాఖ మాసంలో సూర్యోదయ సమయమున నదీస్నానం ఆచరించి, పూజలు, జపాలు, దానాలు భక్తితో నిర్వహించి, వైశాఖ పురాణాన్ని పఠించినవారిపై శ్రీహరి ప్రసన్నుడగును. ఆయన అనుగ్రహంతో భక్తులకు పాప విముక్తి కలిగి, వైకుంఠ ప్రాప్తి సాధ్యమగును. 🙏