వైశాఖ పురాణం 7 వ అధ్యాయము
నారద మహర్షి చెప్పిన విషయాలు విన్నాక అంబరీష మహారాజుకు చాలా ఆశ్చర్యం వేసింది. హేమాంగదుడు అంతటి పాపాలను పోగొట్టుకుని ఎలా ముక్తి పొందాడో, ఆ వైశాఖ ధర్మాల గురించి ఇంకా వివరంగా చెప్పమని కోరాడు. దానికి నారదుడు సంతోషిస్తూ.. “రాజా! విష్ణు కథల మీద ఆసక్తి కలగడం అనేది ఎన్నో జన్మల పుణ్యఫలం. నువ్వు ఇంతటి చక్రవర్తివై ఉండి కూడా భక్తితో అడుగుతున్నావు కాబట్టి, సంసార బంధాల నుండి విముక్తి కలిగించే భాగవత ధర్మాలను వివరిస్తాను విను” అని చెప్పడం మొదలుపెట్టాడు. లోకంలో ఎన్ని ధర్మాలు ఉన్నా వైశాఖ వ్రతం అన్నింటికంటే గొప్పదని, ఇది పాటించడం చాలా సులభమని ఆయన వివరించారు. సరైన రాజు లేని రాజ్యంలో ప్రజలు ఎలా ఇబ్బంది పడతారో, ఈ వ్రతం లేని ఇతర ధర్మాలు కూడా మనిషికి అంతటి కష్టాన్నే ఇస్తాయని, కానీ ఈ వ్రతాన్ని ఆచరిస్తే మాత్రం మంచి రాజు పాలనలో ప్రజలు సుఖంగా ఉన్నట్టు హాయిగా ఉంటుందని చెప్పారు.
వైశాఖ మాసంలో చేయాల్సిన దానాల గురించి చెబుతూ.. నీళ్లతో నిండిన పాత్రలు ఇవ్వడం, దారిలో చలివేంద్రాలు ఏర్పాటు చేయడం, చెప్పులు, గొడుగులు, విసనకర్రలు దానం చేయడం చాలా ముఖ్యమని నారదుడు తెలిపారు. అలాగే నువ్వులు కలిపిన తేనె, ఆవు పాలు, పెరుగు, మజ్జిగ, నెయ్యి, వెన్న వంటివి దానం ఇవ్వాలి. బాటసారుల సౌకర్యం కోసం బావులు, చెరువులు తవ్వించడం, కొబ్బరి నీళ్లు, చెరకు రసం, గంధం, పరుపులు, మంచాలు దానం చేయడం వల్ల అనంతమైన పుణ్యం వస్తుంది. మామిడి పండ్లు, దోస పండ్ల రసాలు ఇవ్వాలి. ముఖ్యంగా పూర్ణిమ రోజున పులిహోర లాంటి చిత్రాన్నాలను, ప్రతిరోజూ పెరుగన్నాన్ని దానం చేయాలి. తాంబూలం ఇవ్వడం, చైత్ర అమావాస్య నాడు వెదురు కొమ్మలను దానం చేయడం కూడా విశేష ఫలితాలను ఇస్తాయి. ఈ కాలంలో దొరికే ఏ రకమైన పూలనైనా, పండ్లనైనా విష్ణువుకు సమర్పించి దానం చేయాలని ఆయన వివరించారు.
దైనందిన నియమాల విషయానికి వస్తే.. రోజూ సూర్యోదయానికి ముందే స్నానం ముగించి, శ్రీమహావిష్ణువును పూజించి, ఆయన కథలను వినాలి. వైశాఖంలో నూనె రాసుకుని స్నానం చేయకూడదు, కేవలం ఆకుల్లోనే భోజనం చేయాలి. ఎండలో అలసివచ్చిన వారికి విసనకర్రతో విసిరి సేదతీర్చాలి. రోజూ పూలతో దేవుడిని పూజించడం, పండ్లు, పెరుగన్నాన్ని నైవేద్యంగా పెట్టడం, గోవులకు గడ్డి వేయడం వంటివి తప్పనిసరిగా చేయాలి. బెల్లం, శొంఠి, బియ్యం, పప్పులు, కూరగాయలు వంటివి కూడా శక్తి కొద్దీ దానం ఇవ్వాలి. ఎవరైనా ప్రయాణికులు కనిపిస్తే వారిని ఆదరించి కుశల ప్రశ్నలు వేసి భోజనం పెట్టాలి. ఇవన్నీ విష్ణువుకు ఎంతో ప్రీతిని కలిగిస్తాయని, పాపాలన్నింటినీ హరిస్తాయని తెలిపారు.
అంతేకాకుండా, స్త్రీలు ఈ వ్రతాన్ని నిర్లక్ష్యం చేస్తే వారికి భర్త సౌఖ్యం గానీ, సంతాన ప్రాప్తి గానీ ఉండవని, వారి కోరికలు తీరవని హెచ్చరించారు. వైశాఖ మాసంలో విష్ణుమూర్తి తన పరివారంతో కలిసి ప్రతి ఇంటినీ గమనిస్తుంటాడు. ఈ సమయంలో పూజలు చేయని వారు దేవుడి కోపానికి గురై నరకానికి వెళ్తారు. కాబట్టి ఆకలితో ఉన్న వారికి అన్నం, దాహం వేసిన వారికి నీళ్లు ఇవ్వడం మనిషి కనీస ధర్మం. నీళ్లు, అన్నం అనేవి ప్రాణాలకు ఆధారం కాబట్టి, వాటిని దానం చేసేవారికి విష్ణువు సకల భోగభాగ్యాలను ఇచ్చి మోక్షాన్ని ప్రసాదిస్తాడు. ఒకవేళ జలదానం చేయని వారు వచ్చే జన్మలో పశువులై పుడతారని, అన్నదానం చేయని వారు పిశాచాలు అవుతారని చెబుతూ.. అన్నదానం చేయక పిశాచంగా మారిన ఒక వ్యక్తికి సంబంధించిన ఆశ్చర్యకరమైన కథను చెబుతానని నారదుడు తన ప్రసంగాన్ని కొనసాగించాడు.
వైశాఖ పురాణం ఏడవ అధ్యాయము సంపూర్ణము
ఎనిమిదవ అధ్యాయం కోసం ఇక్కడ క్లిక్ చేయండి
వైశాఖ పురాణం 1-30 అధ్యాయాలు
వైశాఖ పురాణము (Vaisakha Puranam) లోని అధ్యాయములు:
2వ అధ్యాయం – వైశాఖ మాసమున చేయవలసిన వివిధ దానములు – వాటి ఫలితములు
3వ అధ్యాయం – వివిధ దానములు – వాటి మహత్యములు
4వ అధ్యాయం – వైశాఖ ధర్మ ప్రశంస
5వ అధ్యాయం – వైశాఖమాస విశిష్టత
6వ అధ్యాయం – జలదాన మహత్యము – గృహగోధికా కథ
10వ అధ్యాయం – దక్షయజ్ఞ నాశము – కామదహనము
11వ అధ్యాయం – రతి దుఃఖము – దేవతల ఊరడింపు
13వ అధ్యాయం – అశూన్య శయన వ్రతము
17వ అధ్యాయం – యమ దుఃఖ నిరూపణము
18వ అధ్యాయం – విష్ణువు యముని ఊరడించుట
19వ అధ్యాయం – పిశాచత్వ విముక్తి
20వ అధ్యాయం – పాంచాలరాజు రాజ్యప్రాప్తి
21వ అధ్యాయం – పాంచాలరాజు సాయుజ్యము
22వ అధ్యాయం – దంతిల కోహల శాపవిముక్తి
23వ అధ్యాయం – కిరాతుని పూర్వజన్మ
27వ అధ్యాయం – కలిధర్మములు – పితృముక్తి
28వ అధ్యాయం – అక్షయతృతీయ విశిష్టత
29వ అధ్యాయం – శునీ మోక్షప్రాప్తి
30వ అధ్యాయం – పుష్కరిణి – ఫలశ్రుతి
శ్రీ మహావిష్ణువుకు ప్రీతిపాత్రమైన వైశాఖ మాసంలో సూర్యోదయ సమయమున నదీస్నానం ఆచరించి, పూజలు, జపాలు, దానాలు భక్తితో నిర్వహించి, వైశాఖ పురాణాన్ని పఠించినవారిపై శ్రీహరి ప్రసన్నుడగును. ఆయన అనుగ్రహంతో భక్తులకు పాప విముక్తి కలిగి, వైకుంఠ ప్రాప్తి సాధ్యమగును. 🙏